前排有人問PM我，做醫生係乜嘢感覺，頭頂有冇光環？係咪同平常人一樣咁返工？會唔會返工返到好悶？定係覺得好有使命感好有意義咁過日子？
我應承咗開個post答佢，因為真係唔係三言兩語可以講得晒嘅嘢。你知我又長氣嫁啦。咁容許我Off Topic答左先，嘔少幾啖血先… 不過大鑊，我都寫得幾長，又要分幾個Post。
*****
我見完呢堆問題之後第一個反應就係肯肯定定係 零．光．環。每個醫生都一定要喺醫院做實習。實習嗰陣，大部份時間真係賤過地底泥。有D姑娘都因為你只係一個三個月嘅過客，同埋一個乜嘢都唔識嘅新仔，通常連名都唔會記，直接叫你做「呀侯士文」（houSEman）。間中都有啲好有禮貌會叫你做呀Dr，不過少聽啲囉。連TBB都用呢啲題材來拍膠劇，實習D辛酸野我就唔多講Lu。
到開始做正式醫生MO （medical officer）嗰陣就真係知瀨嘢。你突然之間膊頭重咗好多，多咗好多責任。你真係要孭人哋條命上身。你做錯一個決定都可以影響到人哋嘅健康，影響成個家庭等等。當然你可以話，妖！你讀多啲書叻啲咁你咪唔使害人！我可以好肯定咁話就算讀多幾多書，見多幾多Case，做都幾多年醫生，都會有出錯左嘅一日。始終我哋係人。當然呢個唔係一個好好嘅解釋，但呢個絕對唔係一個藉口。每個醫生都係想幫人。我拒絕去相信每個正常醫生會衰到有心去害人。當然嗰啲病人開咗肚三個鐘，但係自己走咗出去搵真銀另計。
面對呢啲咁沈重嘅壓力，你就會開始諗做醫生其實為乜野？你哋可能覺得醫生搵好多錢，咁有代價係應該。但係我賺嘅所謂錢究竟值唔值得呢種咁大嘅壓力呢？
講真個句，醫生真係唔係搵好多。我知呢一刻可能會有人🙄我。我唔係話我喺貧窮線之下，但係超級富豪又唔輪到我。我唔識投資唔識買股票。我不能夠Fing錢揮霍去買名牌買鑽石買Tesla而唔心痛。我都想。有冇人贊助哈哈！贊助食零食都得架！ 歡迎PM我🤣🤣🤣🤣🤣🤣🤣
你都聽過，兩公婆係醫生都可以儲唔到首期買樓。呢個係香港一個好荒謬嘅特色。最賺錢嘅肯定唔係我呢行。炒股票做iBank做生意俾富豪包分分鐘賺多我幾十百倍。我雖然唔知佢哋個行嘅壓力係點，但係我覺得如果我一個錯誤決定可以令到人哋死的話，只係因為份人工繼續做醫生，就係一定not worth it。
不過當然做醫生唔係淨係開口埋口都講錢。你話幫到人當然會開心。你問個個黎Interview醫學院嘅Candidate點解做醫生，個個都會答真係想能夠做啲實際少少幫到人嘅嘢。使命感唔多唔少之前都有。但係喺香港醫療制度底下，尤其喺公家，你好快就會忘記咗你嘅初衷，又或者俾人搞到好唔想做（公家）醫生。This is another story. 可以摷返我之前篇文嚟睇吓哈哈～
舊時嗰一代做醫生，佢哋係用Authoritative嘅Style睇病人。即係話醫生好有威嚴，可以鬧人，我話一你唔敢話二，我叫你食藥你會乖乖地聽話。依家當然呢一招唔再用得。個個都投訴，個個都上網搜尋完同你講有幾多篇論文係咁講，有幾多篇論文又話咁。科技仲日新月異，有幾多已經電話開咗錄音偷錄我嘅對話都唔會知。慢慢係形成咗有Defensive Medicine呢家嘢。 即係個個都會帶頭盔咁講嘢。面對着開口埋口都鍾意投訴嘅病人/屋企人，就算你嘅醫療決定係正確，你都要捱鬧。唔會有護士一齊幫我對付佢哋，亦都唔會有老細企喺你後面幫拖。最好你自己搞掂曬。就算你明知自己無錯，你都要低聲下氣氹啲病人。佢可以對住你講粗口，問候你祖宗十八代，但你唔可以對住佢地提高定點的聲線。所以光環何來？
好，下篇講我覺得日常嘅返工苦唔苦悶～
Search